धनुषा : प्रदेश २ का मुख्यमन्त्री लालबाबु राउतले सेवा प्रवाहको झन्झटिलो प्रक्रियाले भ्रष्टाचार संस्थागत हुँदै गएको बताएका छन् ।
जनकपुरधाममा आज सम्पन्न ‘प्रशासकीय न्याय, साकारात्मक सोच र सेवा’ विषयक अन्तर्क्रिया कार्यक्रममा मुख्यमन्त्री राउतले यस्तो टिप्पणी गरेका हुन् ।
झन्झटिलो प्रक्रियालाई थेग्न नसकेपछि सेवाग्राही घुस दिएर काम गराउन बाध्य हुने गरेको उनले बताए । सेवा प्रवाहको प्रक्रियालाई जनमुखी र व्यावहारिक बनाउनुपर्ने उनको भनाइ छ ।
मुख्यमन्त्री राउतले भ्रष्टाचार अन्त्यको सुरुवात माथिल्लो तहबाट हुनुपर्ने पनि बताए ।
नियम कानुन मिचेर गरिएको कर्मचारी समायोजनले प्रदेश र स्थानीय तहमा कर्मचारीहरू अतंकित भएको उनको भनाइ थियो ।